Monday, April 30, 2012

പകൽ കിനാവ്‌




ഏകനാ,യാകാശ-
വീഥിയിൽ പാറുന്ന
തൂവെള്ള മേഘവും
നോക്കി ഞാൻ നില്ക്കവേ,

വന്നവൾ മറ്റൊരു
വെള്ളിമേഘം കണ-
ക്കെന്റെ സങ്കല്പ നീ-
ലാകാശ വീഥിയിൽ...

നഷ്ടസ്വർഗ്ഗങ്ങളിൽ
മാത്രം വിരിയുന്ന
കൊച്ചു പുഷ്പങ്ങൾ
നിറഞ്ഞോരു വല്ലിയാൽ

കദനങ്ങൾ പൂക്കുന്ന
കനവിന്റെ തീരത്തി-
ലറിയാതെ,യവളെന്നെ
ബന്ധിച്ചു നിർത്തവേ,

വ്യർത്ഥമോഹങ്ങ-
ളെരിഞ്ഞ ചിത തന്നി-
ലണയാതെ മിന്നുന്ന
കനലിന്റെ വെട്ടത്തി-
ലൊരു മാത്ര വീണ്ടുമെൻ
സ്വർഗ്ഗങ്ങൾ തേടി ഞാൻ...

പേരറിയാത്തൊരു
ചൂടിനാ,ലെന്റെ മെ-
യ്യാകെ പ്പൊതിഞ്ഞ
വിയർപ്പിൻ കണങ്ങളും,

കേൾക്കാത്ത രാഗം
തുളുമ്പുന്ന തന്ത്രികൾ
മീട്ടാൻ കൊതിച്ചൊരെൻ
ചുണ്ടിൻ വിതുമ്പലും,

കോരിത്തരിപ്പുമാ-
യേറ്റുവാങ്ങാനവൾ
ചാരത്തു കാണു,മെ-
ന്നോർത്തു ഞാൻ നോക്കവേ,

ഇല്ലവ,ളെങ്ങോ-
മറഞ്ഞു പോയ്‌;തെല്ലിട-
യെന്നെ മോഹിപ്പിച്ചൊ-
രാവെള്ളി മേഘവും...........!

    -----0------

ടി. യൂ. അശോകൻ

==============================


Re-Posting